AUDREY KOZWANA SKHOSANA
Audrey Kozwana Skhosana owabelethwa mhlana kulilanga lokuthoma enyangeni kaRhoboyi ngomnyaka wee-2000 obuya esizweni samaNdebele ungumma wakwaMahlangu. Ngamakghono nokusebenza uyimbongikazi, umlingisi, umvumi begodu ngomunye wabantu abathuthukisa ilimi nesizwe samaNdebele weSewula Afrika eenkundleni zokuthintana.[1] USkhosana ngokubelethwa wabelethwa bewakhulela eLuthuli ekuyindawo engaphasi kukamasipala weThembisile Hani, ePumalanga. USkhosana wajamela isizwe samaNdebele kuNdoni Miss Cultural ngomnyaka wee-2017 begodu wavela tjhatjhalazi nakazakuba yindlovukazi yeNdoni yeSewula Afrika ngawo wona umnyaka loyo.[2]
Uthe ngomnyaka wee-2020 wathumba ingoma ehlukanisa umnyaka, ngelimi lesiyeni kuthiwa yi-Song Of The Year emrhatjhweni weKwekwezi FM ngengoma yakhe ethi-Ganu ganu lapha abelana khona umbhobho no-King Cube noMega.[3] Kanti ngakho lokhu bekangathomi ukuvela emkhakheni womvumo, kodwana phambilini ukhe wasebenza noLilow NTK engomeni ebizwa bona yipumelelo. Kanti-ke akhange agcine lapho, ubuye waba ngomunye otsonyulwako kuma-SATMA ngaphasi komkhakha wabantu abathuthukisa amalimi wabo eenkundleni zokuthintana ngomnyaka wee-2022.[4] Kuthe nakunjalo waba ngabanye wabavumi abafaka isandla ekwenzeni ingoma noThando Mahlangu ethi Vuka Ndebele ekuyingoma eyenziwe maNdebele begodu umlayezo wengoma leyo uya emaNdebebeleni. [5]
Hlangana namanye amaphojekthi asekelwe ngeemali yi-NAC, iSiyarhaya yiphrojekthi kaSkhosana. Umnqopho wakhona kukuthi ikhuthaza, ilondoloza beyethula isiNdebele eenkundleni zokuthintana. Yakha amathuba walaba abanekarareko ekurhayeni iinkondlo, ikhulisa umthelela weenkondlo ngokusebenzisa amahlelo wokufunda ngokutlama begodu inikela ngomkhakha wemitlolo ohlanganiswe ngcono begodu ongatjhugulukiko eenkolweni. Kanti-ke, iphrojekthi le isungulwe ngomnyaka wee-2022.[6]
Okungaphezu kwalokho, uSkhosana unedokhumentari ayigadangise ku-YouTube esele ukubukelwa kwakhona sekungaphezulu kweengidi ezine. Idokhumentari le ibizwa bona yituthuko yethelerina begodu ikhuluma ngokukhula komntwana omntazana oliNdebele. Iveza ukuthi umntazana udlula kiziphi iingaba zokukhula ukusukela lapha amncani khona ukuya la sekalungele khona ukuthi angenda. Iphothulula khulu ivunulo, umlando kanye nelimi. [7]
IINKOMBA
[edit | hlela umthombo]- ↑ a "About – Audrey Kozwana". audreykozwana.co.za (in English). Retrieved 2025-06-30.
- ↑ Anita (2018-04-18). "Audrey Skhosana 17, Crowned Indoni Miss Cultural 2017/18 ?? - Clipkulture". clipkulture.com (in American English). Retrieved 2025-06-30.
- ↑ "INGOMA - IKWEKWEZIFM". www.ikwekwezifm.co.za (in English). Ithethwe ku the original ngomhlaka 2022-05-27. Retrieved 2025-06-30.
- ↑ "Artist Profile | Slikouronlife". slikouronlife.co.za. Retrieved 2025-06-30.
- ↑ Mthimunye, By Bongani. "THANDO'S SONG FOR HIS PEOPLE". Daily Sun (in American English). Retrieved 2025-06-30.
- ↑ "Siyarhaya – We recite". siyarhaya.co.za (in English). Retrieved 2025-06-30.
- ↑ "Documentaries – Audrey Kozwana". audreykozwana.co.za (in English). Retrieved 2025-06-30.