Amafu
Amafu; Amafu ngezinye zezinto ezimkarisomraro begodu nezibamba indima ekulu ephasini mayelana neenlwana nabantu. Umkarisomraro omkhulu mayelana namafu kukwenzeka kwawo kanye nendawo la atholakala khona. Amafu atholakala esibhakabhakeni begodu ahleli emoyeni ngaphandle kokubona bonyana abanjwe yini. Eenhlokwaneni ezilandelako sizokutjheja bonyana yini amafu, imihlobo edume khulu yamafu kanye nemisebenzi yamafu.
Kuyini amafu?
[edit | hlela umthombo]Ngokuya kwe-Wikipedia (2024)[1] amafu kumvango werhwaba nobutlelezana bamathosi, nezinye izinto lezo ezilenge emoyeni nanyana esibhakabhakeni. I-Wikipedia (2024)[1] ingezelele yathi amafu la abonaka ephasini nanyana atholakala ephasini abakhona ngebanga lomoya okhuphukela phezulu otjhisakho, ofika le phezulu ube makhaza bese uba yirhwaba. Ukuragela phambili, irhwaba le ithi ingaba nobutlelezi obaneleko bese kubamamafu (Wikipedia 2024)[1].
Imihlobo yamafu
[edit | hlela umthombo]
Ngokuya kwe-Lets talk Science (2024) [2]kunemihlobo eminengi yamafu kodwana isirasi, ikhamulasi, istrathasi nenimbasi mihlobo edume nayizwa khulu. I-Twinckl(2024)[3] iveze bonyana amafu isirasi kumamafu lawo aqaleka nanyana afana njengewula begodu adweni. Umhlobo lo wamafu wenziya yirhwaba encani nanyana elula ekhanyelako leyo ewanikela ubudweni. Ikhamulasi mamafu labo avela amakhulu begodu abuboyana nawuwaqalileko (Britannica 2024[4]; Twinckl 2024[3]). Esikhathi esinengi amafu la, agcwala isibhakabhaka kanti avame ukuba nombala omlotha nanyana omhlophe (Britannica 2024; Tinckl 2024[3]). Ngesikhathi amahlophe, vane atjengisa bonyana angekhe aletha izulu; Kodwana lokha nakatjhugululela kumbala ongeleleko omlotha ukuya ebunzimeni vane atjengisa bonyana aze nezulu (Britannica 2024; Twinckl2024[3]).
Istrathasi mamafu adeke khulu lawo othi nawuqala phezulu ongakghoni ukubona nesibhakabhaka kodwana kubonakala wona (Britannica 2024; Twinckl 2024). Esikhathini esinengi mamafu aphasi nanyana aseduze naphasi nanyana abantu (Britannica 2024[4]; Twinckl 2024[3]). I-Twinckl (2024[3]) ingezelele yathi ibanga lokhu amafu la abeseduze nabantu nanyana abephasi kukuthi ayenziwa yikungu. Amafu la enzeka ngesikhathi kumakhaza bese kube nomoya otjhisako nomakhaza ovuthelwako (Britannica 2024[4]; Twinckl2024[3]). Ukuvuthelwa kwemimoya le, ngikho okuqunta bonyana abe dege kangangani (Britannica 2024[4]; Twinckl2024).
Inimbasi mamafu lawo eza nezulu nanyana igabhogo (Britannica 2024[4]; Twinckl 2024[3]). Esikhathini esinengi umhlobo lo wamafu ubonakala khulu ngesikhathi sokuraramba nokuduma kwezulu (Britannica 2024; Twinckl2024). Ngamanye amagama la mamafu akhambisana nezulu elirarambako nanyana elineembani emikhulu.
Imisebenzi yamafu
[edit | hlela umthombo]Amafu anemisebenzi eminengi leyo efaka hlangana ukupholisa nanyana ukwehlisa umtjhiso ephasini lokha nakutjhisa khulu (Wikipedia 2024). Omunye umsebenzi omkhulu kukukwenza bona izulu line ukuze iintjalo nabantu bathole amanzi (Lets talk Science 2024). Izulu angekhe lakghona ukuna ngaphandle kwamafu.
Isiphetho
[edit | hlela umthombo]Amafu umkarisomraro lowo oqakathekileko kithi soke. Begodu kufanele sazi imisebenzi yawo nokuthi enziwa njani. Ukungenzelela imihlobo yamafu nayo kufanele siyizwisise ukuze sizokwazi ukuziphatha ngendlela enqophileko mayelana nayo ngombana eminye imihlobo iza neembani eraramba kabuhlungu khulu.
Umthombolwazi
[edit | hlela umthombo]- ↑ 1.0 1.1 1.2 Wikipedia. 2024. Cloud. Litholaka ku:< https://en.wikipedia.org/wiki/Cloud>. Ifunyenwe [Ngomhlaka 18 kuNobayeni 2024].
- ↑ Lets talk Science. 2024.Weather: Clouds. Litholakala ku:< https://letstalkscience.ca/educational-resources/backgrounders/weather-clouds>. Ifunyenwe [Ngomhlaka 18 kuNobayeni 2024].
- ↑ 3.0 3.1 3.2 3.3 3.4 3.5 3.6 3.7 Twinckl. 2024. Cloud. Litholakala ku:< https://www.twinkl.co.za/teaching-wiki/cloud>. Ifunyenwe [Ngomhlaka 18 kuNobayeni 2024].
- ↑ 4.0 4.1 4.2 4.3 4.4 Britannica. 2024. Cloud: Meteorology. Litholakala ku:< https://www.britannica.com/science/cloud-meteorology>. Ifunyenwe [Ngomhlaka 18 kuNobayeni 2024].