Isitjhaba SamaNdebele
AmaNdebele babantu abanzima abatholakala endaweni yangakwaMhlanga ukuya emva le kiboSiyabuswa, esifundeni sePumalanga kanye nesifundeni sange-Gauteng, eSewula Afrikha. Bababantu abaziwa ngemibala ekhanyako nemigwalo emihle. Baziwa nangokuba nobuntu nethando. [1]
.jpg)
Ilimi
[edit | hlela umthombo]AmaNdebele ahlukane kabili, sinamaNzunza naManala. AManala abuswa yiNgwenyama uMakhosonke II bese kuthi amaNzunza wona abuswe yiNgwenyama uMabhoko III.[2] Amalimi abawakhulumako akafani kukhamba kuba nomehluko omncani lapho nalapho. Isibonelo, amaNzunza ayadla aManala ayagoma. AmaNzunza abuya ageze bese aManala acophe.[3]
Ivunulo
[edit | hlela umthombo]Amandebele avunula ngokuya ngokweengaba zawo. Umntazana, itlawana nomma abavunuli ivunulo efanako. ngokufanako nabobaba nabasegwabo. Abomma bamaNdebele babonakala ngedzila entanyeni, iinrholwani zeenyaweni ezimbili inyawo ngalinye, bavunule nengubo ebizwa ngebhidi enombala onzima nobovu, ukutjengisa bona sele babafazi bakosobantu.[4] Ibhidi balimbatha khulukhulu nabaya eminyanyeni ethileko yamaNdebele. Bambatha netjorholo nesithimba. Amatlwana wona avunula irasu, ithawula bese bafake nerhabi phezulu. Abobaba bambatha amaporiyana, abogedlami nemitjhotjho. Sibe nengubo enimibala emihlanu ekhanyako ebizwa ngombhalo nofana unokhethwabo yona embathwa masokana nakabuya engomeni nabentazana abenze umnyanya wequde.[5]
Ukudla
[edit | hlela umthombo]Amandebele adla ukudla okufaka hlangana iinredlho, itlhodlho, igcatjha, umrorho, umratha, amabhutata kanye namatjhatjhatjha.[6]
Amasiko nomvumo
[edit | hlela umthombo]Isitjhaba samaNdebele saziwa ngomvumo waso omnandi nopholileko owenzwa ngokusebenzisa iinsimbi neenodo. Ezifana negatara, isidonodono, iskumere, amahlwayi neewahlo. Umvumabo ubaneembongo zeenkosi, iingwenyama kunye namasikwabo. Imivumabo iba neemfundo ongazithola. Bavuma iingoma zabo eminyanyeni efana nedwende, iqude, umnyanya wamasokana, ukuhlabisa iinzukulwana, nokungenisa abobaba hlangana kweminye yawo.[7]
Amasikwabo afakahlangana amasikopilo afana nengoma, iqude nedwendwe. Ingoma kulokha umsana akhamba naboyise nabomnakwabo entabeni ayokuthatha ubusokana bakhe bekathole nentanga. Kuthi iqude ke mnyanya wokukhulisa umntwana womntazana osele akhulakhulile lapha ayokuyalwa khona ngokuziphatha nomemdo. Yena-ke akabonani nabantu abaduna nebemzini isikhathi esithileko bekudle iqude kube mhlubulwakhe ngombana vane azilile.[8]Idwendwe lona mtjhado wesiNdebele lapha isokana eliwelileko elinentanga lithatha umntazana othombileko lizomvunulisa iitjorholo zakwabo. Bese kuthi ngeLesihlanu umkhwenyana lo aphekelelwe bangani bakhe bentangakhe base umakoti kwabo naye aphekelelwa bafazi bemzini endele kiwo bamuse kwabo neenkomo nofana nobukhazi nedwendwe. Sibe nomnyanya wokungenisa abobaba lo mnyanya wokungenisa uSosokana ngakwandodanakhe akhamba nabakhambisanani bakhe okungaba banakwabo nabangani bakhe.
Amandebele babantu abahlonipha khulu, umuntu omdala nakakhulumako umntwana uyalalela begodu agobe ihloko akaphenduli bangakamtjeli bona enze njalo. Abantu abadala balotjhiswa ngezandla zombili nofana ngasinye ngokusekela esingaphasi. Bayazi bona umuntu uyalotjhiswa nanyana amncani, ihlonipho ayikhethi minyaka. Nabalotjhisako bathi "Lotjhani" nofana "Akwande" okutjho bona akwande umusa, ukuthula nethando.[9]
Imikhombo
[edit | hlela umthombo]- ↑ https://ndebelekingdom.org/history
- ↑ https://ndebelekingdom.org/history
- ↑ https://www.krugerpark.co.za/africa_ndebele.html
- ↑ https://www.africancraftsmarket.com/african-tribes/ndebele-people.html
- ↑ https://www.krugerpark.co.za/africa_ndebele.html
- ↑ https://www.britannica.com/topic/Ndebele-South-African-people
- ↑ https://mukurukurumedia.wordpress.com/2015/09/21/queen-of-ndebele-music-on-a-mission-to-preserve-heritage-and-culture/
- ↑ https://sahistory.org.za/article/ndebele
- ↑ https://sahistory.org.za/article/ndebele