MBUSI MAHLANGU
UMbusi Mahlangu yiNgwenyama yamaNdebele wakwaNzunza. Wabelethwa mhlana amalanga ama-4 kuMrhayili ngomnyaka we-1985 eMthambothini ePumalanga. Ubelethwa ngumma uSiphila Dlamini weSwazini ebukhosini bakwaNgwane, uyikosazana ebelethwa yiNgwenyama uSobhuza Dlamini. Ungomunye wabogogo besizwe hlangana kilaba abakhona, kanti-ke ngenani abogogo besizwe sakwaNzunza bahlanu begodu uNyumbabo Cornelias Mahlangu oyiNgwenayma uMayitjha II nguye uyise likaMbusi Mahlangu. [1]UMahlangu ubelethwa bewulanywa bantwana abapheze bamatjhumi amabili, kubalwa hlangana ikosazana uMbali Mahlangu ongusomarhwebo.[2] UMahlangu wahlala esihlalweni sakhe sobukhosi aba yiNgwenyama uMabhoko wesithathu ngomnyaka wee-2005, ubukhosobu ubuthatha kuyise lokha nakazakubhubha ngawo wona umnyaka lo.[3]
INgwenyama uMabhoko III uhlobana nesizwe nobobukhosi beSwazini njengombana kusekhabomkhulu, nakabona iNgwenyama uMswati III uthi malume bese abuye ahlobane nesizwe kanye nobukhosi bakwaZulu njengombana yena neNgwenyama uMisizulu babomntamama okutjho ukuthi abomma babo babelethwa ngubaba munye. Okukhona kukuthi ngomnyaka wee-2005 ikomitjhi yobudosiphambili ngobukhosi bendabuko elawula ubukhosi eSewula Afrika ebizwa bona yiNhlapho Commision yathatha isiqunto sokobana ubungwenyama ngakwaNzunza bungasaba khona buphethe ngeNgwenyama uMabhoko III bese amaNdebele woke weSewula Afrika wakwaNzunza newakwaManala abuswe yingwenyama yinye ekuyiNgwenyama uMakhosoke II. [4]
Qobe mnyaka ngenyanga kaNobayeni mhlana malanga ama-19 kuba nesikhumbuzo seNgwenyama uNyabela erholweni lakwaNzunza lapho ubukhosi bakwaNzunza Mabhoko bumema isizwe soke bona sizokugidinga ilangeli, kulapho iNgwenyama uMabhoko III ikhuluma khona nesizwe sakhe. Irholo lakwaNzunza Mabhoko kulapho ipi yamaNdebele namabhunu yenzeka khona.
INgwenyama uMabhoko III uragela phambili ngokubusa isizwe sakhe, ukhe wavakatjhelwa nguMongameli wenarha u-Cyril Ramaphosa ngomnyaka wee-2024 lapha kwaba khona nekulumo yangemsithelweni phakathi kwesigodlo sakwaNzunza Mabhoko nomongameli wenarha. [5] Kanti namanye amarhwebo azuza ngenarha yamaNdebele ayavakatjhelwa njengayo-SASOL.
- ↑ https://web.archive.org/web/20090330174035/http://uqconnect.net/~zzhsoszy/states/southafrica/ndzundzandebele.html
- ↑ https://live.fundza.mobi/home/library/non-fiction-articles-profiles/mbali-mahlungu-an-entrepreneur-with-a-passion-for-life/comment-page-1/
- ↑ https://web.archive.org/web/20090330174035/http://uqconnect.net/~zzhsoszy/states/southafrica/ndzundzandebele.html
- ↑ https://www.news24.com/citypress/news/court-rules-on-amandebele-kingship-20161001
- ↑ https://www.moroka.gov.za/?page_id=4542