Solomon Kalushi Mahlangu
USolomon Kalushi Mahlangu wabelethwa mhlana amalanga ama-10 kuVelabahlinze ngomnyaka we-1956, ngobuhlanga ubuya esizweni samaNsebele weSewula Afrika. Begade amlweli wekululeko yabantu begodu alilunga lehlangano ye-ANC, uMkhonto wesizwe. UMahlangu wabelethelwa endaweni yange-Doronkop ePumalanga begodu ungewesithandathu ngakwabo.[1] [2]Ekufundeni kwakhe ungene isikolo semazingeni aphezulu esikolweni esibizwa bona yi-Mamelodi High School begodu isikolwesi savalwa ngebanga lemiguruguru eyayikhona ngomnyaka we-1976 ethinta i-Soweto uprisings. Kanti-ke ngebanga lokulwa nombuso obewukhahlumeza abantu wagwetjwa isigwebo sentambo bewabulawa mhlana amalanga asi-6 kuSihlabantangana ngomnyaka we-1979 aneminyaka ema-22 kwaphela.[3]
UMahlangu waya enarheni ye-Angola wayokulungiselelwa ukuba lijoni begodu bekalilunga lesiqhema esibizwa bona yi-June 16 Detachment ngaphasi kwehlangano yeMK. Unobangela waleli gama kukuthi yena nabanye bebayingcenye yabafundi ebegade basemgurugurwini womnyaka we-1976. Lokhu kwenzeka ngemva kokuthi ayokubhaqa iinyanga ezisithandathu zoke e-Mozambique.[4] Ukubotjhwa nokugwetjwa kwakhe kulandela isiga esenzeka mhlana amalanga ali-13 kuMgwengweni ngomnyaka we-1967 la begade ano-George Mahlangu no-Mondy Motaung eJwanasibhege, bebeze ngesibanga sokuzokuhanganyela nenengi ukuzokukhunjulwa khona okwenzeka mhlana amalanga ali-16 kuMgwengweni bese kwathi kunjalo kwadubuleka abasebenzi ababili, badutjulwa ngu-Motaung lokha nabazama ukubalekela amapholisa nase amapholisa abasolela ngokuthile ngombana bebaphethe amabhege. Kanti enye yamabhege la yawa yaphuma isigidi se-AK47.[5]
Kwathi mhlana amalanga ali-7 kuSinyikhaba ngomnyaka we-1977 kulapho uMahlangu wathoma ukukhamba khona ikhotho, wabendwa ngamaqala wokubulala abantu ababili nanoma begade kungasuye owabadubulako begodu akhange ikhotho ivume bona uMahlangu afake isibawo seenlilo. [6] Bathi lokha nabazomlengisa uMahlangu wakhuluma amagama wakhe wokugcina asithi, ''Nitjele abantu bami ngiyabahanda. Baragele phambili balwe. Iingazi zami ziyokondla umuthi ozokuthela iinthelo zekululeko.''[7] Kanti ke wangcwatjwa emalibeni we-Mamelodi bewafakelwa ilitje elitlowe amagama wakhe wokugcina.[8]
Ilifa likaMahlangu alithathelwa phasi, kunelitje elakhiweko njengesikhumbuzo lapha elibizwa bona yi-Solomon Mahlangu Freedom Square e-Mamelodi .[9] Indlela yePitori eyayaziwa ngokuthi yi-Hans Strijdom Drive yatlanywa ngobutjha yathiwa yi-Solomon Mahlangu Drive.[10] Eyunivesithi ye-Witwatersrand umakhiwo we-ofisi lokubuza nokuphatha libizwa bona yi-Solomon Mahlangu House.[11] Kanti-ke, kunefilimu elibizwa bona yiKalushi eveza umlando wakhe nokhunye okunengi, okufaka hlangana i-Solomon Kalushi Mahlangu Scholarship Fund ebhadalela abantwana bona bafunde emayunivesithi.[12]
- ↑ "Rhodes University hall residences renamed after Solomon Mahlangu and Hugh Masekela". www.ru.ac.za (in American English). 2011-07-21. Retrieved 2025-06-30.
- ↑ "Solomon Kalushi Mahlangu | South African History Online". sahistory.org.za. Retrieved 2025-06-30.
- ↑ "Solomon Kalushi Mahlangu | South African History Online". sahistory.org.za. Retrieved 2025-06-30.
- ↑ "uMkhonto weSizwe (MK) Timeline 1961-1990 | South African History Online". sahistory.org.za. Retrieved 2025-06-30.
- ↑ "Solomon Kalushi Mahlangu | South African History Online". sahistory.org.za. Retrieved 2025-06-30.
- ↑ "Solomon Kalushi Mahlangu (1956 - 1979) | South African Government". www.gov.za. Retrieved 2025-06-30.
- ↑ "Solomon Kalushi Mahlangu (1956 - 1979) | South African Government". www.gov.za. Retrieved 2025-06-30.
- ↑ Makhafola, Getrude (2009-02-19). "LOOK: Solomon Mhlangu tombstone unveiled in Mamelodi". IOL (in English). Retrieved 2025-06-30.
- ↑ "Solomon Mahlangu Statue details". www.artefacts.co.za. Retrieved 2025-06-30.
- ↑ Content, Print (2015-08-12). "City loses battle over street names". Rekord (in British English). Retrieved 2025-06-30.
- ↑ "Solomon Mahlangu House, Wits University | 011 717 1000 | Johannesburg". AfricaBizInfo (in English). Retrieved 2025-06-30.
- ↑ "Solomon Kalushi Mahlangu Scholarship Fund". nydawebsite.azurewebsites.net. Retrieved 2025-06-30.