Ukubulawa kwabafazi nabantwana eSewula Afrika
Ukubulawa kwabafazi eSewula Afrika sekuyinto yangamalanga. Isibalo esikhona sitjengisa bona abafazi nabantwana bayagagadlhelwa bebabulawe mndeni nofana mumuntu obaziko, lokhu kwenzeka qobe imizuzu elitjhumi elangeni ephasini loke jikelele bese eSewula Afrika abafazi abaziingidi ezilihlanu namakhulu amahlanu bayabulawa. Isibalwesi sakhutjhwa ngomnyaka wee-2020 ukuya kumnyaka wee-2021 [1].
Ngeveke yokuthoma kaSinyikhaba ngomnyaka wee-2025 abantu abatjha eenkundleni zokuthintana njenge-Facebook ne-TikTok bathome ijima lokulwisana naso isigesi. Ihlangano eyaziwa khulu ngokulwela ilungelo lokuphila labafazi eSewula Afrika ebizwa bona yi-Women for Change ngiyo edosa phambili ijimeli. Ihlangano le ayilweli abafazi kwaphela kodwana ilwela nabantwana kanye namadoda, woke umuntu obuleweko iyamulwela begodu koke lokhu bakwenza khulu eenkundleni zokuthintana ngokusunduza ijima elithize. Njenganje bathome ijima lokobana woke umuntu agadangise isithombe sombala omsobo ukuze urhulumende amemezele bekavume bona ukubulawa kwabafazi kube yihlekelele yesitjhaba, kanti-ke abantu abanengi basabele benza njalo. [2]
I-Women For Change le yasungulwa ngomnyaka wee-2016, basebenzisa amandla aseenkundleni zokuthintana ukuyelelisa abantu boke ngokuhlukumezana ngokobulili kanye nokubulawa kwabafazi eSewula Afrika. Ayigcini lapho, ihlangano le ibuye isekele laba abasindileko beyisunduze itjhuguluko lamambala emphakathini[3].
Okhunye okukhona kukuthi kuphume iphepha lomoya (eliku-inthanethi) lesibawo lokuthi abantu batlikitle ukuze urhulumende asivume isibawo sokuthi ukubulawa kwabafazi kube yihlekelele yesitjhaba. Kanti-ke kuhlelwa nokuthi mhlazana amalanga ama-21 kuSinyikhaba ngomnyaka wona esiphezu kwawo lo kuzokuvalwa yoke into, kungabi nento eyenziwako, woke umuntu ahlale ekhaya - abasebenzako bangayi emsebenzini bese abafundi bangayi neenkolweni. Lokhu ngelimi lesiyeni ibizwa bona yi-national shut down [4].